1ܩܲܫܝܼܫܵܐ ܠܓܵܐܝܼܘܿܣ ܡܘܼܚܸܒܵܐ؛ ܠܗ̇ܘ ܕܐܵܢܵܐ ܡܲܚܘܼܒܹܐ ܝ݇ܘܸܢ ܒܣܲܪܲܣܬܘܼܬܵܐ. 2ܡܘܼܚܸܒܲܢ؛ ܨܵܠܘܿܝܹܐ ܝܘܸܢ ܕܒܟܠ ܡܸܢܕܝܼ ܡܲܢܬܸܬ؛ ܘܗܵܘܹܝܬ ܨܵܚ؛ ܕܵܐܟܼܝܼ ܕܓܵܢܘܼܟܼ ܡܲܢܬܘܼܝܹܐ ܝ݇ܠܵܗ̇. 3ܣܵܒܵܒ ܚܕܹܐܠܝܼ ܪܵܒܵܐ ܟܲܕ ܒܹܐܬܵܝܵܐ ܝ݇ܢܵܐ ܐܵܚܘܿܢܘܵܬܹ̈ܐ؛ ܘܒܝܼܵܗ݇ܒܼܵܐ ܝ݇ܢܵܐ ܣܵܗܕܘܼܬܵܐ ܥܲܠ ܣܲܪܲܣܬܘܼܬܘܼܟܼ ܕܵܐܟܼܝܼ ܕܐܲܢ݇ܬ ܒܣܲܪܲܣܬܘܼܬܵܐ ܒܸܚܕܵܪܵܐ ܝܘܸܬ. 4ܘܕܒܘܼܫ ܓܘܼܪܬܵܐ ܡ̣ܢ ܕܐܵܗܵܐ ܚܲܕܘܼܬܵܐ ܠܲܝܬ ܠܝܼ؛ ܕܫܵܡܥܸܢ ܒܢܘܿܢܹ̈ܐ ܕܝܼܝܼ ܒܣܲܪܲܣܬܘܼܬܵܐ ܒܸܚܕܵܪܵܐ ܝ݇ܢܵܐ. 5ܡܘܼܚܸܒܲܢ؛ ܫܘܼܠܵܐ ܡܗܘܼܡܢܵܐ ܒܸܥܒܼܵܕܵܐ ܝ݇ܘܸܬ ܟܠ ܕܒܸܥܒܼܵܕܵܐ ܝܘܸܬ ܠܟܸܣ ܐܵܚܘܿܢܘܵܬܹ̈ܐ؛ ܘܐܵܢܝܼ ܕܝܼܢܵܐ ܢܘܼܟܼܪ̈ܵܝܹܐ؛ 6ܐܵܢܝܼ ܕܝܸܗ݇ܒܼܸܠܗܘܿܢ ܣܵܗܕܘܼܬܵܐ ܥܲܠ ܚܘܼܒܘܼܟܼ ܩܵܕ݇ܡ ܥܹܕܬܵܐ؛ ܠܐܵܢܝܼ ܕܨܦܵܝܝܼ ܒܸܥܒܼܵܕܵܐ ܝ݇ܘܸܬ ܟܲܕ ܡܲܦܫܸܛܸܬ ܠܗ݇ܘܿܢ؛ ܕܵܐܟܼܝܼ ܕܚܵܫܚܵܐ ܠܐܲܠܵܗܵܐ. 7ܣܵܒܵܒ ܒܚܵܬܸܪ ܦܠܸܛܠܗ݇ܘܿܢ؛ ܟܲܕ ܡܸܢܕܝܼ ܠܵܐ ܫܩܸܠܗ݇ܘܿܢ ܡ̣ܢ ܛܵܝܸܦܹ̈ܐ. 8ܒܲܣ ܐܸܠܲܢ ܘܵܓ̰ܸܒ ܝ݇ܠܵܗ̇ ܠܩܵܒܘܿܠܹܐ ܠܐܵܢܝܼ ܕܐܲܝܟܼ ܐܲܢܹܐ؛ ܕܗܲܝܸܪ̈ܵܢܹܐ ܗܵܘܵܚ ܠܣܲܪܲܣܬܘܼܬܵܐ. 9ܟܬܸܒܼܠܝܼ ܠܥܹܕܬܵܐ؛ ܐܝܼܢܵܐ ܗ̇ܘ ܕܒܵܥܝܹܐ ܗܵܘܹܐ ܪܹܫܵܝܵܐ ܒܓܵܘܵܝܗܝ؛ ܕܝܼܘܿܛܪܵܦܲܐܣ؛ ܠܹܐ ܝ݇ܠܹܗ ܩܵܒܘܿܠܲܢ. 10ܣܵܒܵܒ ܕܐܵܗܵܐ؛ ܐܸܢ ܐܵܬܸܢ؛ ܒܸܬ ܡܲܕܟܼܸܪܸܢ ܦܘܼܠܚܵܢ̈ܘܼܗܝ ܕܒܸܥܒܼܵܕܵܐ ܝ݇ܠܹܗ؛ ܕܒܗܹܡܸܙܡܵܢܹ̈ܐ ܒܝܼܫܹ̈ܐ ܒܸܬܢܵܝܵܐ ܝ݇ܠܹܗ ܥܲܠܲܢ. ܘܟܲܕ ܠܵܐ ܡܠܹܐܠܗ݇ܘܿܢ ܐܸܠܹܗ ܐܲܢܹܐ؛ ܠܵܐ ܗ̇ܘ ܩܵܒܘܿܠܹܐ ܝ݇ܠܹܗ ܠܐܵܚܘܿܢܘܵܬܹ̈ܐ؛ ܘܠܐܵܢܝܼ ܕܩܵܒܠܝܼ ܡܲܟܠܘܼܝܹܐ ܝ݇ܠܹܗ؛ ܘܦܵܠܘܿܛܹܐ ܝ݇ܠܹܗ ܐܘܼܦ ܡ̣ܢ ܥܹܕܬܵܐ. 11ܡܘܼܚܸܒܲܢ؛ ܠܵܐ ܕܵܡܸܬ ܠܒ̇ܝܼܫܬܵܐ؛ ܐܸܠܵܐ ܠܛܵܒܼܬܵܐ. ܗ̇ܘ ܕܥܵܒܼܸܕ ܛܵܒܼܬܵܐ ܡ̣ܢ ܐܲܠܵܗܵܐ ܝ݇ܠܹܗ؛ ܘܗ̇ܘ ܕܥܵܒܼܸܕ ܒܝܼܫܬܵܐ ܠܹܐ ܝ݇ܠܹܗ ܚܸܙܝܹܗ ܠܐܲܠܵܗܵܐ. 12ܥܲܠ ܕܝܼܡܲܛܪܝܼܘܿܣ ܐܝܼܬ ܣܵܗܕܘܼܬܵܐ ܡ̣ܢ ܟܠ ܐ݇ܢܵܫܵܐ؛ ܘܡ̣ܢ ܣܲܪܲܣܬܘܼܬܵܐ ܒܓܵܢܘܼܗ̇. ܘܐܘܼܦ ܐܲܚܢܲܢ ܒܝܼܵܗ݇ܒܼܵܐ ܝܘܵܚ ܣܵܗܕܘܼܬܵܐ؛ ܘܒܝܼܕܵܥܝܵܐ ܝܘܸܬ ܕܣܵܕܘܼܬܵܐ ܕܝܼܲܢ ܫܲܪܝܼܪܬܵܐ ܝ݇ܠܵܗ̇. 13ܪܵܒܵܐ ܡܸܢܕܝܼܵܢܹ̈ܐ ܐܝܼܬ ܗَܘܵܘ ܠܝܼ ܠܸܟܬܵܒܼܵܐ ܐܸܠܘܼܟܼ؛ ܐܸܠܵܐ ܠܹܐ ܝ݇ܘܸܢ ܒܸܒܥܵܝܵܐ ܕܒܝܼܲܕ ܒܸܕܝܘܼܬܵܐ ܘܩܵܠܵܡܵܐ ܟܵܬܒܼܸܢ ܐܸܠܘܼܟܼ. 14ܐܝܼܢܵܐ ܒܗܹܒܼܝܼ ܝ݇ܘܸܢ ܕܓ̰ܲܕܹܐ ܚܵܙܸܢܘܼܟܼ؛ ܘܦܘܼܡܵܐ ܠܟܸܣ ܦܘܼܡܵܐ ܗܲܡܙܸܡܲܚ. 15ܫܠܵܡܵܐ ܗܵܘܹܐ ܥܲܡܘܼܟܼ. ܒܝܼܵܗ݇ܒܼܵܐ ܝ݇ܢܵܐ ܫܠܵܡܵܐ ܐܸܠܘܼܟܼ ܕܵܘܣܬܹ̈ܐ. ܗܲܒܼ݇ܠ ܫܠܵܡܵܐ ܠܕܵܘܣܬܹ̈ܐ؛ ܟܠ ܐ݇ܢܵܫܵܐ ܒܫܸܡܹܗ.